الاخ يس ود العمه رمضان كريم ونحن جاهزين ان شاء الله
الاخ حسيب الحبيب لك تحياتي
بخصوص كرة شرقيه س وعبد القغربيه دي كانت في كاب الجداد في مطلع الثمانينات وكان فريق السديره فيه ويادر الحادو والعنكب وسمبو وود مسمار وخضر ود الرضيه وعادل جد الناس وعمر عدلان وغيرهم من الافذاذ ناصر وحكومه كنا بنمشي انا وعبد القادر ود الاعيقص وحسبو العوض وانس عبد الملك كنا نتغدا عند ناس عبد القادر كسره بي سليقه يعني قبل الملاح ما يخلص طبعا بالسرقه كانت ايام جميله توضح حبنا للمعشوقه السديره
فريق العمالقه ذلك الفريق العملاق بالجد بعضويته الممثله الفريق وهم عباره عن اصدقاء حاولو يغيرو التاريخ بتكوين فريق بغض النظر عن النتائج يتكون الفريق من ود الشام وحسبو وقدوره وابراهيم ود العبد وود الشيخ وانس وحارث وغيرهم من الاصدقاء وكانت النتائج كارثيه ( ودا عاوز ليه بوست لوحده يتحث فيه حسبو وود الشيخ وابراهيم ود العبد )

جامعة امدرمان الاهليه كنا مجموعة شباب من الشرقيه فيهم بكري ود العبد وشهاب وعلي ابراهيم ورمزي ودفع الله قدوم
كانتايام جميله مارسنا فيها جميع انواع اللف ود الدوران وقرينا بدون قروش بالرغم من ان الجامعه كانت بي فلوس
كنا نحضر الحفلات بالمجان كانت صياعه بالجد يعني
الطيران المدني كانت الفتره العمليه الاولي وكان معي شقيقي ود الشيخ لفترة سنتين نعمل في حسابات المطارات الولائيه وكانت من اجمل الفترات
شخصيات اسطوريه
ود الشيخ استاذي وحبيبي وابن عمي والذي شكل شخصيتي بالتواجد المستمر والدائم مع بعض وهو من الافذاذ اللذين تعرفت عليهم يمتاز بالذكاء الحاد المثمر والاخلاص وحب الغير بدون مقابل والفهم العميق والعالي للحياه وله فلسفته فيها عيبه انه عازب للان ما عندكم لي ليهو مره
عثمان يابا كبير صاحب القلب الكبير والضحكه الحلوه من الاعماق عشنا اجمل فتراتنا مع بعض برضو عذابي للاسف

رمزي حسب رفيق الصبا والدرب صاحب اليد البيضاء بالرغم من الكفاف الذي كان يعيشه في فترة الجامعه واكرم انسان قابلته