عوووووك نااس ست الدار جابو ليهم تفزليون ,كان يرددها واحد من الشفع وهو جاااري علينا ويلهث ,كنا مجموعة من الصبية غرقانين لاضنينا في لعبة شليل وينو وجنبنا واحدين مدورين ليك لعبة الرمة وحراسة وعلي صوت الفاتح الكديسة توقف اللعب وتجمعنا حول الفاتح الكديسة باقي خبرو مولع ناااار , وطوالي حمّاد ابكريشة سألو :- ها الفاتح تلزيون ده شنو ؟ رد الفاتح :- والله ده حلو حلا ! يتدخل الجيلي ود نفيسة :- ذي الكستر ذي الكستر ولا ذي الجِبنة ؟ يرد الفاتح كديسة :- بس جاااري علي كرشك دي كستر شنو انت قايلو بياكلو , هنا مسكت زمام الحديث :- اسمو التفلزيون ! عااد الود ما ناقش وعراااف وشاف الخرتوم عاد في زول بغالطني (كااااك) ده صندوق مربع اصفر بجيبو فيهو الناس اتكلمو وبجيبو فيهو الموسللات (المسلسلات) عاد الزول ما شاف التلزيون مرة واحده عند ناااس خالتو فاطمة لما مشي زارم مع اموا وقعد حاااارس الشي ده ومنطط عينيهو لمن رجع البلد , وقال الفاتح كديسة الناااس ملمومين عند ناااس ست الدار بيركبوا في الداهي ده وانتو قاعدين مع شليل يلاكم , وقمنا بذمرتنا ديك وااااي واحد مسك عراقي الدمووورية (الذي القومي في الحلة) في سنونو وهااااك يا شتات علي ناااس ست الدار وصلنا هنااك ولقينا الاعمي شائل المكسر والنااس الكبااار والمنظراتية بركبوا في الاريل وكنا بنقول عليهو الارسال تسمع النعيم ود حمد بيقول : هاجنا ركب الارسال ده خلنا نشووف اللخبار اتسرع , طبعا بعد جهد جهيد ويمين يسار الارساااال جاء وطبعا خااااتين التلفزيون معلقنو فووووق علي برميل والبرميل خاتين تحتو طوووب ونحن نجي نتحسس الجهاااز والواحد يقووول هد هلا هلا السمح , بعد الصورة ظهرت وكان شغااال برنامج اسمو ربوووع السودان يعني وقع علي العروووب في جرح والناااس دي اتكيفت جنس كيف ها جنا اسكت خلنا النسمع كويس .الجنيد داااك لما شاااف المصيبة دي والناس راااح علي الصندوق عشااان يلمس النسوان البرقصن والجماعة مسكو يا الله ويامين هاازوول اقيف ماش وين وداك شغال خلني النلمسها ,تلمس شنو يا ابرويساً يشبة التبشة اقعد يقعد فرتك , بجاي الضبع ود اللمين مااارق لسانو تلات امتار وفاتح خشمو فتحة فرن والريالة سائلة بحووور , وبهناك حميدان العربي حااال ما اندمج في الشي ده كان خاتي ليهو سفة قدر الهقلة ووتف تف بصقها فوووق الناااس القدامو , يا اخي ده منو البذق فوقنا السفة ده , ده انا حميدان ما قدرت اتلفت .
بعد برنامج ربوع السوداني انتهي جاءت الدعايات (وطق في طق ومن انتاج حلويات سعد) العرب ديل اي وااحد مسك عكااازو وربوها جنس ربه لامن الدعايات انتهت وبداء برنامج يتحدث عن ادغااال افريقيا وفجاءة ظهر اسد متوحش ساااكي ليهو غزالة وجابو ليك شكلو كااامل في الشاشة , كان تسمع فططتك
فططتك كرب طاااخ كش كرااااااش دش ها زول عفصتني , هي اقيفوا ................
ولنا عوووودة
