نافذة علي الماضي الجميل

عاشق الديار كتب:

ايه الجمال دا يا الشمالي
لديك قدره فائقه علي السرد القصصي الرائع والذي يساهم في اثراء المنتدي
نتمني التواصل
واوعي تكسل يا الحبيب
ولك ودي

الجميل الاخ عاشق الديار كل الشكر علي المرور
وردك الجميل وان شاء كسل مافي وايد علي ايد
تجدع بعيد

حسبو العوض كتب:

الشمالي التختها عليك..وين يازول انت من زمااان؟ نحنا حرم حكاويك وحكاياتك دي متقريفين ليها بالحيييييل شديد...وتاني حاجه..سوي لينا واحده عليك الله من السديره والشخصيات مسموح ليك قول ساااكت مافي زول بسعلك..وبجد ابدعت وكملت الروعه ونحنا منتظرينك يا ابو ايمن..

صديقي العزيز حسبو يعلم الله الواحد خرمان ليك عديل كده
ومنبرش وراقد سلطة علا يا حسيب اخوي الله غالب ,
مشكور علي المرور وان شاء نفرد مساحة لانسان السديرة الجميل
كان ما يجي واحد ناطي علي بعكااااز هاهاهاهاهاها

محمد قسم السيد حمد كتب:

مابين روعة السرد وظرف الراوى تتراء للناظر شخصياتدرامية الحركة تراجيدبة الاداءماساوية الموقف سرد تضحك الى درجة البكاء تضحك من الموقف وتبكى على صاحبه الذى مازالت بلدى عزة فيها الظلم الاجتماغى والنظرة الدونية لانسان الريف الجوانى ناهيك عن اطراف المدائن وشكرا مبدعنا شمالى

الاخ محمد قسم السيد شكرا لك وان تبث فينا القوة
علي الاستمرار وتزرع فينا الصمود , ومشكور
علي كلماتك الجميلة ولك كل الود

عــــــــــــــــــــــدنا

مسكت السرة بت حمد الودكة من ست الدار وجلطتها فوق باقي شعيراتها , وكان في الجمع الحريمي امونة مرت محمود وسعدية بت جادين والزينة بت سعد وجمع كريم من بنات الحلة من عمر خمستاشر ولا فوق , اها النسوان قعمزن تب وشربن الجبنة والماخمج وست الدار نادت ولدها عشان يشغل المصيبة الجني وصل سلك البطارية بااااقي الكهرباء لسع ما جات بعندهم وقاااال كده التلزيون اشتغل وكان في برنااامج حواااري رجااااال كان تسمع السرة هاااا نسوووان اتقنعن من الرجاااال بري يا يمة طمسة التابة واليابة ابوي الرجااال شنو ؟ بعد شوية النسوان ديل ما تشوف الا عينيهم المالقت ليها طرحة خشت في طرف توب اختها , هي الرجااال النطاقين ديل بنتهوا بتين ؟ تسألت سعدية بت جادين ,اكان قرصتها جميلة بت السرة ها اسكتي ما يسمعوك وتفضحينا . انتهت نقة الرجاااال وبدا مسلسل الدهباية والنسوووان من شافن ليك الدهاااابية كان تسمع هي هي ان شاء الله عيني السمحات المكان , وووووب علي انا من الرقبة ان شاء الله رقبتي بعد الكبر ده دي واحدة عمرها فوووق السبعين ورقبتها بقت هبود , واااااي انا من الضمير الرضية المجنونة قامت تكورك بااااقي عندها دستووور ولما يجيها الا يجيبو ليها توب احمر , قامن النسوان مسكنها وعكمنها بالغصب هووووي يالرضية ده ما وكت دستوووور خلنا نشوف البت السمحة , هي واي انا من الـ.......
....... لكن بتبالغي يااا حبوبة الرجال الجوه بسمعوووك , وقال كده المسلسل دوّر علي حزائني وجابو الموسيقي الحزينة البتقطع القلب اكان تسمع رقية الدلالية هي هي هي هي والدميعات كبن جو يا حليلها بت بت امي وتسمع واحدة شييييط تف وتتنهد ونص النسوان دموعن جرن والباقيات اخر حزن يا حليلها يا بت امي شوية كده كان تسمع هي سجمي الدهباية الزووول بوراااااك ما يضرب بالسكين اجري اجري يا بتي
ولما الدهباية طعنوها بالسكين كان تسمع الثكلي ضرب ثكلي السرة الحلة دي كلها عارفاهو هي الليلة ويييييي وللللللللللووووووو كر كر كر علي اهلك وبت وقعت والدم كب جو, تسمع واحدة قالت ريحة الدم طلعت شويتين النسووووان بقن يعزن حيبوب بوب وبوب ههي هيهي هي هي هي واي واحدة ختت يدها في راس التانية والمعزة دور رجال الحلة سمعوا صوت الثكلي علي ناااس ست الدار والحلة اتلمت هااا ناااس المااات منو ؟ الدهباية , الدهباية بت عوض الجيد دي هسع كانت بجاااي ماتت كيف , لا لا الدهباية الليلة التلزوون تلزوون اكسر رويساتكن ديل امرقن مرقت روحن وحاجة السرة راسها والف سيف يمشن يعزن علي الدهباية في اهلها وقااالن بياجرن لوري الكدك من الصبااااح

و و وو ووووو

ولي عوووودة

الزول السمح حكيه ونضيف اصله روعة مابنتنقطع النلحق اعزى فى الدهباية قبال العنقريب اجيبوه واللوم اقع و و و وجصل حبيبنا مبدعنا شمالينا